泰一流泰國菜 (已結業)

舖面得六张4人卡位，典型小店格局。半只泰式海南鸡已去九成几骨，鸡皮下起到层啫喱，尚且有啲鸡味。炸虾饼本身4件，自行分为8件半形，面包糠外皮脆，内心热到辣咀，口感弹牙。串烧鸡猪有啲悬念。鸡肉匀咗少许葱段逐粒串；猪肉一块过，竹签宁舍粗身似现成串烧package。两款口感同好食度都系鸡肉优胜。提供𠮶个咖哩色酱汁就唔够杰身又唔够味，似用水稀释过。泰式鲜虾炒金边粉，甜酸汁都几重手，颇甜，有啲冚咗虾味。马拉盏通菜，有啲偏咸。叫杯芒果沙冰，姐姐仔叫我地先饮几啖，以为咩事，原来佢话将榨汁机剩番啲芒果沙冰倒埋俾我哋费事嘥，呢啲贴地嘢认真小店特色。