孖沙茶餐廳 (已結業)

再一次嚟到孖沙，目的当然系要试一试呢度嘅至尊颓饭(3眼仔饭)，睇吓究竟有咩特别，我当日去到孖沙𠮶阵时，仲差大约10分钟先至到上午11:00点，但店内已经坐满客人，哗……唔系吖嘛？所有真系有理由相信3眼仔饭到中午12:00前可能就会卖哂，幸好我赶得切埋位，然后即刻叫阿姐帮我落单要个肠仔煎蛋饭，阿姐同我讲，话3眼仔饭最少要等20分钟，我话冇问题，等咗廿分钟之后，碟饭终于嚟度枱面，3只蛋真系煎得好靓，而且带有㶶边，肠仔炸过非常香口，再加埋秘制甜豉油及烟韧嘅饭粒，将蛋黄笃穿，蛋汁+甜豉油+饭粒嚟一次大兜乱，即刻产生咗化学作用，真系好味！喺我食紧饭嘅同时，我听到老板向客人系第3次同客人讲煎蛋饭暂停(短短15分钟内第3次叫暂停)，认真夸张，而且呢度嘅用餐环境真系非常挤迫，一张好细嘅圆枱，但同时要坐7个人一齐用膳，所以要嚟孖沙开饭嘅朋友就要有心理准备，食饭嘅动作真系唔好过大，否则会好容易撞亲隔离