歡喜燒 (已結業)

如果食放题食到冇晒新意，可以嚟呢间「欢喜烧」搞搞新主意！呢间虽然主打食串烧，不过仲有其他小食供应，款式都唔少㗎！一入座就把握时间去攞嘢饮，罐装纸包乜都有，汽水、茶类、果汁类随便选择，跟住就去狂扫串烧，款式都几多，一round都食唔晒，鸡翼、五花腩、澳洲牛柳、羊肉串、鸡肾等等到候都系我哋嘅心头好。呢部无火串烧机相当过瘾，红外线发热，有唔同温度可调校，绝对唔会好似韩烧咁多烟，只要开着部机，将串烧放上去，佢就自己会不停转住烧，火力均匀，一次可以烧十几串，望住啲食物喺度转转转，真系好治愈啊！系等紧烧熟嘅过程，当然去食下现成嘅食物，今日有豉椒炒蚬，够晒惹味！另外海鲜粥都几鲜甜可口，好多蚝和青口。入场仲送泰式焗茄子，相当大条，加埋啲香蒜，几好味呀！另外仲有好多炸物小食，开始食唔切啦！见到串烧开始有泡泡出就差唔多食得！唔会烧得太干，仲有肉汁，加埋酱汁更加好味！我自己就最钟意呢度嘅牛、羊和鸡翼，食完肉当然要食返多啲蔬菜类，秋葵、车厘茄和菠萝都系几唔错嘅选择！最后仲有几款甜品、雪糕和台式冰沙添！二百蚊咁食法，相当抵玩！