泰爸爸

营业中

休息中

朋友放假，佢约我去到奥海城食饭。原来喺奥海城地下外围，仲有咁多餐厅，朋友唔带我去都唔知，最后我哋就拣咗间食泰国嘢嘅餐厅。呢间餐厅座位有室内同室外，因为落雨关系，我哋就拣咗坐里面。室内环境灯光黄黄，坐得舒服。呢度都几多嘢食，朋友叫咗泰式虾饼、鲜虾炒金边粉同埋黄咖哩薯仔鸡。呢度d泰式虾饼个样都几特别，用返虾嘅造型，切为细细件，一口一啖。虾饼入口仲系热，虾胶打得几好，食落好有质感，虾味真实。旁边个酱调味调得几好，甜甜辣辣，虾饼点埋个酱仲好食。鲜虾炒金边粉够大碟，鲜虾大只，咬落弹牙爽口，金边粉炒得几好，唔会炒到散晒，入口又唔会油淋淋，酸酸地。加埋豆干，鸡蛋等配菜一齐食就觉得更加香。泰式黄咖哩薯仔鸡份量正常，d鸡细细嚿，食落唔鞋。黄咖哩味道几好，甜甜哋，唔辣，几香。里面嘅配菜红黄青椒同洋葱都甜甜地，薯仔就炆得淋。只要咖哩味道做得好，基本上配乜都好好食。食晒d嘢仲有咖哩汁剩，所以我哋再叫左个泰式薄饼，即叫即整。呢个薄饼比较湿润，唔会干争争，煎得好香口，点埋咖哩汁食仲好味。