貢茶 (匯景花園) (已結業)

自从系台湾饮过手作仙草冻之后就念念不忘，返港后饮过几间一系过甜、一系仙草碎湿湿，最对办既一定系贡茶。 可惜贡茶分店虽多，每次想饮时总会发现地点阴差阳错地远离我经常活动既区域。今晚仙草瘾起，打算求其系蓝田揾间台式饮品店试下，点知惊喜地发现汇景商场有贡茶新分店！铺位细细同时位于该层最入既位置，到达时唔太多人，所以不假思索地落单后近乎廿秒内就有得饮喇。鲜奶仙草冻 ($23)简简单单，满满既仙草冻同鲜奶装满一杯就制成。 仙草冻带独有既仙草幽香，甜度岩岩好，大大块滑嘟嘟连埋鲜奶一齐饮，香滑度更上另一个层次。 由于鲜奶饮品唔可以选择甜度同冰度，亦唔会点加冰，如果职员贪快就咁将鲜奶放出黎唔雪住，好多时都会饮到唔够冻既出品。 好欣赏呢个分店既鲜奶仙草冻唔洗落冰都够哂冻，好有水准。可能装得比较满，饮饮下好论尽咁饮到成身都系，店员好窝心咁提醒我可以狂拎台面既纸巾，做到台湾个种人情味，抵赞。