L.D.K. by Ufufu Café (新城市廣場) (已結業)

上次打风早收工，经过沙田新城市广场见到有间日式西餐厅，但系打风原因餐厅早收，于是去咗隔离𠮶间德国餐厅，心思思一直想试返间日式西餐厅，因为餐牌非常吸引，今日得有机会就过去试一试。平日夜晚7点去到唔使排队，可以直接入座，我哋两个人叫咗鹅肝汉堡铁板，另外加咗个酥皮粟米汤、白饭同埋沙律＆日式咖哩猪扒蛋包饭，仲有甜品芒果芭菲。. 认真好耐未食过咁好味鹅肝，入口溶化，配上似系日式嘅甜烧汁，配埋白饭真系无得输，好好味，呢间餐厅餐牌写明用嘅系日本新泻米，好有米香，果然系日本米，用料的确唔错，仲有个酥皮粟米汤都好香牛油味，粟米超甜味浓。相比之下日式咖哩蛋包饭就比下去了，蛋好滑但唔觉有蛋香，入面的饭系加左香菇黎煮，个人比较喜欢茄汁饭，猪扒炸得香脆，外脆内软啖啖肉，反而日式咖哩感觉上系一般超市货色。最后梗系试埋佢哋餐牌最吸睛嘅甜品啦，原本想试蜜瓜班戟，可惜蜜瓜班戟系要下午两点至五点先有，唯有改为芒果芭菲， 芒果一般唔算好甜，忌廉香滑，中层有啲脆米，底层系芒果味嘅啫喱，我个人唔系咁钟意佢嘅口感，所以呢个甜品都系一般，下次要试返蜜瓜班戟先得。