莎巴馬來西亞餐廳 (已搬遷) 新店位置

听讲，海南鸡饭喺呢度嘅名菜，午巿开价 75 蚊再加一，系咪值回票价？见好多客都食紧鸡饭，有鸡胸鸡翼版，随后侍应姐姐送上嚟嘅，竟然系鸡脾！鸡件堆放成小山丘咁，量多，皮薄肉滑，部份鸡件嘅皮层同白肉之间，夹住一层啫喱胶汁。呢层尊贵的胶汁，超耐冇见过，今日有缘遇上，回忆返晒嚟。老规矩先食饭。饭粒分明兼有嚼头，充满油香，越食越想食，好味过鸡肉，只怪鸡肉滑得嚟唔够咸。净食鸡肉系淡口咗啲，但沾埋辣酱同姜蓉一齐食，即时回魂。初食个辣酱好似唔多辣，食吓食吓先见真章。另一午餐青咖喱鸡拣咗跟白饭，椰汁味唔浓，少辣，吸收晒汁头精华的茄子比鸡肉更惹味，送饭一流。                               午餐包一杯饮品（冻饮免加钱），冻柠茶有四块厚切柠檬，闻到柠檬香；冻啡够浓香，唔同茶记的单调味道。想转饮拉茶，就要畀多 10 蚊。对比网友的旧相，而家午餐冇咗餐汤，甜品变为平价朱古力，好吓人。如果一个人嚟，食海南鸡饭系最抵。建议最好系避开繁忙时间嚟，呢度环境好逼，人声嘈爆，尤其坐长枱开饭，好似返咗去学校饭堂咁。值得赞系店员勤快的服务。