Coffeeholic (已結業)

经开苏杭街，揾食就去咗呢间coffee shop。铺仔细细，得三张枱，因为疫情关系，仲要限制两人一枱，都几惨，加埋都系做得个六个客max。我地嗌左两个lunch set。堂食有七五折，跟餐野饮减$21。落完单好快送上两杯仔餐汤，今日系南瓜汤，好香既南瓜汤，质地系稠身个只，几好味，不过好细杯，两三淡饮晒。D- 沙律配慢煮鸡腿($96)：个鸡俾肉系走骨，慢煮系唔同啲，d鸡肉一啲都唔鞋。沙律除咗沙律菜之外，仲有啲焗香左嘅腰果（几香脆）、苹果干（好干，好柴）、同一只蛋（蛋唔系流心，只可以话系软心，应该系雪柜啱啱拎出嚟，冻冻地）。巴马臣芝士，其实系洒左啲芝士粉系上面。自家蜂蜜芥末酱，完全食唔出好似系普通醋汁。可能对于女仔来讲其实系够，不过对男士来讲，就会细得滞啰。H- 黑松露杂菌意大利饭配大啡菇($104)：分量好似太细，朋友食完觉得唔饱。呢个意大利饭唔会煮到淋晒，总算有啲嚼头。黑松露味好出，大啡菇亦都煮得够晒淋，好味既。Flat white ：好滑。拉花好令，画左个女仔，好大杯。Americano： 几好味。背景音乐细细声，环境静静地，感觉几好。趁依家冇乜人，可以慢慢食，叹埋杯咖啡。