常滿百家菜 (已結業)

今晚本来想同太太去杨屋道买料打鞭佬，奈何整天落雨，加上太太做完「飞素」回来已经五点几，但系打鞭佬条瘾仍在，于是近近地试吓呢间常满，真系遮都唔驶担。是晚收费$139，再加$10任饮，但系我地八点前交台又平返廿蚊，即系同平日价钱一样。地方唔大，而且几大排档FEEL，但系都算干净。有两个大筒，一个放啤酒(森堡加狮威)，一个放汽水(好多款，主要系忌廉同冰红茶)，另外有架果汁先生机，睇住系原樽倒落去，冇沟水。呢度嘅免费锅底都几多架，除左常见嘅清汤、沙爹之外，仲有水煮锅，而且仲可以双拼，咁就试吓清汤拼水煮。汤底几厚，水煮𠮶边捞到好多辣椒同花椒，真系又麻又辣，清汤就普通料。火锅料选择比较少，但质素唔错，肥牛唔系七肥三瘦𠮶只，菜类都算新鲜，系D虾好细只。漏单情况唔严重。另外每位一件响铃(OK，不过唔系好GOOD)。惊喜嘅竟然系呢度熟食嘅水准，自取嘅炒菜同炸鸡翼，两样都暖嘅，鸡翼仲好脆口添。至于点心，我地只系试左虾饺、烧卖、春卷同炸云吞，虾饺好多虾，好爽口，烧卖大大粒，炸云吞同春卷都好脆，全部都系即叫即做，所以要等耐D。八点前饱晒交台，悭返廿蚊！