洪祖師 (已結業)

本来同女朋友谂住去食潮兴旺，泊低车后见到呢间台湾小店，于是试下新嘢。先睇餐牌，都几多选择，尤其系小食方面，价钱都算抵，我叫左个红烧牛肉面$68，女友叫左鸡肉麻酱热拌面$58，呢个价钱仲跟杯台式饮品，另外可以半价加个小食，于是拣左盐酥鸡同卤牛筋。先上小食（唔记得影相），盐酥鸡即炸，个皮好脆，椒盐都落得适宜，不过皮略嫌稍厚，肉都嫩嘅。👌🏻卤牛筋好腍、入味，加少少椰菜，唔错。👍🏻主菜先上牛肉面，呢度嘅面系写手工嘅，食落口好弹牙，应该真系手工制，汤底好浓郁，我女友话有台湾味。牛肉骤眼底以为好鞋，但食落系多汁，唔会靭，我欣赏佢有埋红萝卜同菜，健康啲。😋女朋友叫嘅麻酱面，佢拣左少辣，我地食过都觉得个麻酱好浓郁，配埋个麻辣味好夹，舖头系有花过心思嘅，欣赏。🤤最后两杯珍珠奶茶，叫左少甜走冰（饮左几啖先记得影相），满意佢真系有少甜，好多舖头叫完少甜都系咁甜😂味道上够奶味，有台湾𠮶只茶香味，珍珠正常，弹口，我地都满意。全单$151，食咁多嘢有埋嘢饮，味道仲要几好，我地都觉得有惊喜，大家可以一试。