港灣壹號

营业中

休息中

呢次喺grand Hyatt 「港湾壹号」食中菜庆祝爸妈嘅生日，𠮶晚因为太迟订枱，所以只坐到8楼，冇办法欣赏到落地玻璃嘅维港夜景，有啲可惜。不过食物方面，开胃菜有「琥珀合桃」同「梅酒香小红茄」，正！合桃甜中带酥，好快俾我个女K.O.晒，小红茄酸甜开胃，仲有好香嘅酒味，啱晒我爸食。主菜方面，「蜜糖汁叉烧」真系有惊喜，色香味俱全，啖啖肉又好弹牙，大人细路都争住食。「脆皮龙岗鸡」都算唔错，皮脆肉嫩；「镇江醋香黑豚猪柳」就正常；「砂㶽干煸蟹肉炒粉丝」就ok，不过「烟熏马友」就好出色，烟熏味好香，食落去好滋味。甜品方面，本身想试蛋挞，不过要等20分钟，所以算了，最后试咗「黑白芝麻千层糕」同「凤梨奶皇千层酥」，十分满意，尤其系凤梨奶皇千层酥，香脆得嚟又唔腻，好快就清碟，下次一定encore。服务质素同环境都好赞，尤其系餐具设计得好精致，连小朋友用嘅餐具都好靓，见到餐厅好用心。整体嚟讲，虽然今次冇抢到靓夜景，但食物同服务已经足够令人开心，庆祝嘅心情一点都冇减。推荐俾想食粤菜嘅朋友！