心之食堂 (裝修中)

今日忽然好想食日本野，系OpenRice揾到呢间喺铜锣湾百乐中心嘅居酒屋，Menu有炸物，烧物，刺身，卷物，石锅饭等等… 好多选择，决定同男朋友嚟食晚饭。海胆蟹籽杯卖相非常精致，啲海胆好鲜甜，捞埋啲蟹籽一齐食，够晒开胃，唔好睇佢细细杯咁，其实份量都唔少。吉列炸蚝面头炸得好香脆又热辣辣，肉质肥美，咬落去好Juicy。蒜片牛柳粒石锅饭，牛柳粒嘅份量好多，好有肉汁，加埋啲蒜片同埋底下嘅脆脆饭焦一齐食，好香口，份量够晒两至三个人食。韩式芝士炸鸡卖相超级邪恶，炸鸡上面铺满好多芝士，仲可以拉丝，记得一定要趁热食！烧鱿鱼系原条上既，上面搽满咗照烧汁，味道非常夹，入口肉质烟韧弹牙。烧茄子上面铺满咗好多好多蒜蓉，烧得好香，非常惹味。总括黎讲呢间居酒屋环境食物都唔错，下次会再黎！