泰嘟嘟

营业中

休息中

大角咀一向都多餐厅，间唔中都会黎呢区揾食，经过泰嘟嘟见到装修几有心思，墙身有tuk tuk涂鸦，又挂左泰国足球球衣，泰拳服装。卡位又整到好似tuk tuk，成间店都好有泰国感觉，几有特色。食物方面选择好多，选择困难症又出现，样样都想食，但2个人食唔到好多。最后拣左3款食物，分量都几多，好满足，整体性价比唔错。咖喱面包软壳蟹 ($188)一上枱已经觉得好吸引，好大个多士盒，铺满咖喱汁，同餐牌上图片一样咁靓，绝对唔系图片只供参考。软壳蟹大大件，炸得好香脆。咖喱汁浓厚，椰香好重，系唔辣嘅咖喱，用黎点面包食非常适合。当日见到好多枱客人都有点，呢道菜真系必点菜式，推介! 炭烧猪颈肉($78)猪颈肉上枱会有一个炉仔兴住热住，唔怕放得耐会冻晒，食都最后都仲系热，非常细心。猪颈肉烧到焦香，口感爽脆有弹性，唔会腌到过分软，配上酱汁，酸酸辣辣，非常惹味。飞天通菜($68)通菜分量几多，蒜蓉加辣椒炒，炒得好惹味，香辣香辣，好食！芒果芝士沙冰($32)食泰菜唔少得芒果，沙冰芒果味浓，甜度适中，芝士奶盖幼滑，面头仲加左芒果果肉，感觉清新。