馬姐重慶麻辣燙(老字號)

营业中

休息中

辣瘾又起，经过呢间食店好似好辣咁，于是决定入去试一试。小食种类算好多，净系蔬菜都有六款选择。为食嘅我睇左好耐餐牌，最后点左一碗四送中辣重庆酸辣米线。重庆酸辣汤底有生菜，花生，酸菜，肉碎，生蒜作配菜，花生够脆，酸菜吾系一味死酸又大大块𠮶只，我喜欢！加生蒜好香，只嫌肉碎半肥瘦，吾啱我口味，我个人钟意食好瘦嘅肉碎，有咬口嘛！我拣左猪红，豆卜，腐皮，鸡肾，抄手。猪红好吃，吾会一夹就散，豆卜浸到发大，入晒味，腐皮吾抵食，五蚊得好少，鸡肾切到细细粒，介花，有咬口，不过无乜鸡肾味，如果可以切大粒多少少会更好，抄手系自家制，里面嘅馅好似生菜鱼肉果啲鱼肉咁，少少弹，皮大馅少反而更好食，八蚊有五只，几抵食。中辣刚刚好，有辣味之余又吾会一味得个辣字，好多时大辣比中辣油好多，辣到苦，盖过左其他食材嘅味道。米线系比较幼身，但吾会淋b b,好食，但本人食量惊人，份量略嫌少，食完成碗未觉饱，下次要加底先得！我下午四点黎食，人好少，坐得比较舒服啲，其实呢度好细，晚餐时段黎食应该会几忟，座位之间好迫，系食完就即刻埋单走𠮶只，不过店员几有礼貌，一边包抄手一边招呼我，呢餐合共$58($2买左包纸巾，无饮嘢)，我觉得抵食。