漁吉海鮮丼專門店 (已搬遷) 新店位置

收工特登搭巴士黎九龙城食呢间出名大份又足料嘅海鲜丼。呢间渔吉位置距离太子道东巴士站只需要3分钟，系正街角，装修又突出，所以一定唔会行过龙。呢度系典型日式木系装修，墙上有壁画，座位都几多架。餐牌上最吸引我地系渔吉特选丼（$198），胜在包罗万有，除左玉子，仲有11种鱼生！主流嘅鱼生，好似三文鱼、油甘鱼、赤虾、赤身、左口鱼边、帆立贝、海胆都有！竟然仲有比较少见嘅星鳗，好薄身，好长一条，味道似鳗鱼。呢度鱼生够新鲜，咁足料嘅丼绝对满足晒我地～另外呢度新推出松叶蟹三味丼（$238），有三条剥壳嘅松叶蟹脚，仲有大量蟹肉，同埋混有蟹膏嘅蟹肉，当然唔少得蟹籽！蟹控啱晒！原来蟹膏加蟹肉系咁正，味道依然好浓，捞饭啱晒！小食方面点左蒲烧鳗鱼（$88），切开有四大件。系肉质比较硬身嘅鳗鱼，调味刚好唔会过咸！呢度有一大壶面豉汤，用平时啲茶壶装，唔讲都唔知系汤！原来免费任饮！要大力摇，先倒到面豉出黎。咸度刚好，搞到我地饮完又饮停不了！