Thai Smile (已結業)

泰式食店响上环唔多，而且口味都有大幅调教过黎迁就香港人口味。不过最近新开咗间泰式食店，现于试业期间，只供外卖，$45蚊两𩠌饭，同区唔算贵，冇理由唔试。女婿蛋 - 味道甜甜哋，有啲似中式牛柳汁，蛋系全熟蛋，外层炸过，容易上汁，芫荽，葱酥，辣椒非常惹味。泰式红咖哩 - 望落唔够红，但食落超有风味。虽然味道都有点甜，但香味十足，用料齐全。连普遍泰国餐馆唔用嘅豆茄子都有落，豆茄子味道微甘，里面有种子，食嘅时候爆发出独特清爽嘅香气。还有如乒乓波大小嘅小白茄，都系泰菜常用嘅，茄子吸收咗咖哩汁嘅精华，加上嫩滑口感，𩠌饭一流。汁料味精层次多，香料味道分明而融恰，很不错嘅咖哩。虾酱炒饭 - 味道都系偏甜，虾酱味唔够出，但味道整体有百吃不厌之感。樱花虾磨碎捞入饭中，点点鲜红色为炒饭观感上带黎唔少生气。等饭时，同老板娘倾咗两句。据讲，店舖选用泰国食材，连豉油都系泰国货，尽量保留原有风味。不过老板娘承认，佢嘅泰菜系有调整到适合港人口味，但亦忠于原著。食店大厨Apple系泰国人，对于泰国传统菜做法熟悉，亦喺香港居住多年，认识香港人口味。