心夜來潮 (已結業)

同成班朋友食饭， 净系谂食咩，成日都谂到头都大埋，咁啱见到网上有人介绍旺角嘅呢一间心夜来潮， 评价都似乎唔错， 一于去试下。非常多选择，样样都好想试，真系好苦恼。见到每枱客都有嗌嘅酱卤鹅肠，食落非常肥美，酱汁香浓，但系唔会太咸，而且鹅肠好 爽脆 ，非常新鲜。打冷当然要叫鸭蛋炸蚝饼啦，呢度嘅蚝饼都相当出色，炸得啱啱好，唔会太油腻，而且每粒蚝仔都好大粒，非常肥美鲜味。我哋仲叫咗个卜卜蚬煲，每粒花甲都好大只 ，每只都大过个五蚊银 ，肉质鲜甜， 汤底就用咗粟米粉丝芹菜等等， 加埋蚬嘅甜味 ，令个汤都好好饮， 忍唔住清晒啲汤。而呢一个原只土窑手撕鸡，系即叫即蒸 ，用咗荷叶包实原只鸡，鸡肉鲜嫩肥美 ，好香嘅香料味，捞饭一 底 流。主食方面，我哋就叫咗呢一个沙锅潮州粥，可以选择唔同嘅配料，加入粥底。我哋就选择咗肉蟹鲜虾同咸猪骨， 肉蟹非常多膏， 肉质好甜 ，蟹膏融入粥底，令到个粥底变得金黄色，而且鲜虾都非常弹牙爽口， 加埋鲜甜嘅粥，令人忍唔住一碗接一碗咁食。成餐 都食得好丰富好饱，不过围返都系每人二百蚊松啲， 以旺角嚟讲，仲食到咁多海鲜，呢个价钱都几抵食。