NeNe Chicken (東港城) (已結業)

「Nene星级炸鸡汉堡伴脆炸薯条」薯条正常，Burger个包烘得几脆口，个酱汁都几辣。「炸鸡达人」七件唔同口味既无骨炸鸡。见到有啲鸡红色酱、橙色粉……，侍应完全唔知啲鸡系咩口味，餐牌亦冇写。餐牌相同实物挣得几远下，例如餐牌相入面有两件鸡系舖满大葱之类既野，但实物完全冇呢样野。图中右下𠮶件系劲辣，其他冇咁辣/唔辣，有咖哩、芝士、原味……其他食唔出系咩。「脆炸紫菜虾卷」成个卷从外面既紫菜到入面既炸虾都唔脆，甚至老土啲讲句，可以话食虾冇虾味。「蘑菇炒粉丝」味道一般，以配料味道吊味，好多菇，好多蛋，仲有云耳、萝卜丝……韩式粉丝但配料偏中式，有啲唔夹，粉丝炒得唔好，啲粉丝痴埋一住住。所有食物上桌都只系微暖。午餐餐牌上，汉堡同炸鸡拼盘都冇辣椒仔既图示，但餐牌上有其他餐点系有辣椒仔既图示。服务方面，问侍应关于食物既问题，唔知道就靠估，乱答完就算。用餐期间仲曾经有一位女侍应弹跳式咁喺走廊跑过去同事堆度倾计。餐厅3点半清场，啲侍应好似完全唔知咁，3点25分先开始通知在场客人同出单。呢间炸鸡系香港都开左一段时间，分店亦都有好几间，但从餐牌、服务到食物味道质素都令人意想不到。