日之食放題館 (已結業)

第一次开饭食评献比你地。呢间野第二次黎食。本来谂住食楼下间韩式边炉，但同行的其中一个友人唔食牛，加上见到呢间野7点前入坐有四人同行一人免费，所以就上去食啦。去到冇人等位，我地5个人都坐到6人坐位。野食方面，以放题黎讲真系算唔错，寿司细细件，唔会话用饭质饱你。系寿司饭唔ok,煲得太烂。所有肉都冇餣过，但枱面有盐同胡椒比你调味。上食物速度都冇之前咁差。但d服务态度真心不济。话说我地点左三文鱼刺身，一上枱个样有d瘀黑，食落仲有d腥，咁我同同行友人就放块刺身上铁板度烧烧个面先食。烧左几块之后，有个唔知部长定老板既男人行埋黎，话：「嗱，你地唔好再放d刺身落去烧呀下」咁我估系怕整㶶块铁板痴底之类。咁就讲左句：「唔好意思呀吓，惊痴底系咪呀。」之后个男人话，「唔系惊痴底，系你咁烧，嘥左我d野，再见到就唔出刺身比你地。张纸写左架，你地自己睇返」哗，呢d咩态度呀？你d腥既三文鱼刺身又有几靓呀。仲要收加一服务费，但咩都系自助咁济。如果要贴钱买难受，我宁愿比贵d唔洗受气。可以既话， 服务直头想比负分。