型品牛排 (已結業)

今晚试咗个西冷五成熟($98)，加咗个海鲜酥皮汤连饮品既combo($45)。个汤都唔错，酥皮好香牛油味；西冷到了！块排面有啲类似七味粉既香料，将整块排密封覆盖，完全冇哂牛排既天然纹理，我都未落刀，中间一个小洞竟然喷出血泡泡，完全系有生命迹象。一切开就发现系二成熟，错了，由左至右起，二成至六成，真系估佢唔到！我叫个waiter帮我再整熟啲，个waiter好有礼貌兼好有笑容。又上枱了，再嚟一次，块排系之前𠮶块，七成熟，有啲鞋口。其实咁既价钱食牛排系咁既质素，我已有准备，不过咁既价钱我已经可以去食一碗劲好味既拉面，我知道牛排同拉面比较系有啲唔公平，但起码食完好味既食物会好满足。饮品我叫咗冻柠茶，几好，可以冲走饱滞既感觉。埋单时，supervisor发现我食剩半块西冷，佢问我意见，我讲哂佢听，佢同我讲咗十次八次sorry，今时今日真系好需要呢种服务态度，我个人非常欣赏。呢间餐厅既厨师们仍有好有进步空间，尽管食材有限制，但加倍努力一定会做出更好既食物。