La Postre (已結業)

上次去咗尖沙咀𠮶间分店食过，已经觉得环境装修有心思，有个大大嘅钟喺墙上面，待应醒目，而且食物质数好。不过无写食评，今次再嚟铜锣湾呢间，虽然店舖比尖沙咀细间，但喺枱边都有摆放D小装饰，墙上亦挂有不同嘅钟做点缀，舒适而精致。当然要介绍下啦。食物，我地叫咗芝士蟹饼、西班牙海鲜饭、蜜瓜黑毛猪(24个月)、西班牙猪手、啤酒煮蚝、青柠蜜桃沙冰、荔枝mojito、芒果mojito、朱古力布朗尼窝夫。基本上样样都好食，尤其是西班牙猪手&海鲜饭。西班牙猪手: 同其他嘅餐厅好唔同，因为佢并非原只猪手上，而系已经切开咗，起咗肉，再捞埋个甜甜酸酸嘅酱汁&酸青爪、酸蒿头、沙律菜等等嘅配料一齐，味道一流，也不肥腻，仲有一小杯蜜糖可以自行加埋入去，真系食唔停口。西班牙海鲜饭: 叫咗2人份量，但都足够4个人食。有青口4只、蚬、虾4只、仲有沙乐美肠。虽然无落到番红花，但系个饭整得好入味，觉得饭比海鲜更加好味。另外亦要赞一下服务员先生，服务细心，除经常会主动添水、换碟之外，仲会用眼神同你交流，望一望就知道要攞个写住Happy birthday嘅甜品出嚟，令到生日嘅人相当有惊喜。非常满意。