新樂園

营业中

休息中

畸宝人会叫柴湾角𠮶排熟食档叫大档，呢间系畸宝人至爱饭堂之一，本人一星期至少会食一次。畸宝人都会叫佢「泰婆」，叫佢新乐园反而无人知你想去边度食。有个水mark mark嘅泰裔事头婆，经常笑容满面。大牌档当然有户外位，呢度头顶部电视播嘅电影仲新过有线电影台。佢都有一个板间室内冷气房，密密坐大约可坐30人。挂住泰王嘅相，又有寄卖啲泰国手工布袋，大牌档中的异国情怀。除泰式之选外，午餐都有两三款港式炒面饭，照顾唔同客人需要。我叫得最多系阿泽都赞好嘅海南鸡，讲真四十几蚊又唔好要求只鸡会识飞，我觉得最重点系个泰式酸辣姜蓉汁，单单系佢都送到几碗饭。lunch迟咗去有时油饭会卖哂，得白饭。有时转吓口味，猪手饭都唔错，好冧好入味好多骨胶原。叻沙个汤底就无黑色百胜厨即食面咁香浓，不过都唔差。黄咖喱充满椰香，配炸脾或猪扒都系超大份。畀钱系食完自己行去老板娘度讲自己食过咩，大家讲个信字。