Aroma Truffle (已結業)

自从试过朋友喺新加坡买返嚟嘅咸蛋黄同黑松露薯片之后，我就一直念念不忘，后来咸蛋黄薯片进军香港，总算可以止一止痒，奈何黑松露薯片一直未见踪影，最近发现Aroma Truffle终于进军香港，作为小粉丝嘅我当然要会一会佢。颜色鲜明嘅纸袋上面印住the world ’s strongest truffle chips，相当有自信，门店暂时有三种味道，分别系原味、蜜糖芥末味同芝士味，我拣咗原味同蜜糖芥末味。记忆中第一次食就系食原味嘅黑松露薯片，一打开包装，黑松露迷人嘅香气令人不自觉合起双眼深呼吸。薯片切成大波浪形，令黑松露嘅味道更突出，唔止闻落去好香，食落去黑松露嘅味道同样明显，仲加入香草碎令味道层次更丰富，口感亦非常香脆。除咗原味之外我仲买埋未试过嘅蜜糖芥末味，非常有惊喜。薯片嘅松露味道同样香浓，但蜜糖嘅味道更加突出，所以比较起上嚟黑松露嘅味道就比原味弱少少，但蜜糖味好清新，一啲都唔人工，加上薄荷叶碎点缀，食极都唔腻。薯片每包100g，份量都唔少，但面对诱人嘅松露香，试问又点忍得口，一次一包实在系湿湿碎，下次经过一定要买埋芝士味！