Athletic Juice & Espresso Bar (已結業)

约左朋友去PMQ睇文字展，估唔到都几有趣㖞，字嘅演变到造型唔了解都唔知咁多。睇完又周围行下发现左呢间街角小店，主打文青风配上健康饮品，创出一番新风味。牛油果咖啡。以原个牛油果起肉再倒入LATTE，单单造型已经加满分。咖啡味香滑，饮时溶入左牛油果嘅果脂，味道更丰富淳厚。果肉都无一点浪费，打成蓉后垫在咖啡之下，一来方便固定及造型，二来可以一啖咖啡一啖牛油果肉咁轮住食，以油分令咖啡嘅甘涩味大大减轻。加$18可以配多个酥皮包／曲奇，配成一SET咁慢慢叹。酥皮包入面嘅系榛子酱，配合咖啡味道一流。另一款凤凰ＬＡＴＴＥ，入口更顺滑。以红菜头糖浆做成嘅拉花图案睇又饮得，入口又无蜜糖咁浓郁，而系淡淡嘅甘香味散发出黎。以味道而言觉得高分过牛油果咖啡。呢度麻雀虽小但五脏俱全，仲提供埋充电线使用，几贴心。小店虽小但选择都几多，店内仲有各款咖啡豆选购，饮啱口味仲可以买返屋企继续叹。另一主打鲜制水果饮品及季节限定饮品都好吸引，下次可以再来一尝滋味。望住林宝坚尼叹咖啡，都系几唔错嘅享受。