萬發海鮮菜館 (已結業)

好耐无黎食，于是星期日晚就去食晚饭。由于去到时时间尚早，唔洗等，不过都坐满约七、八成。顶汤鸡脚煲上次见人食，好似好正咁，我地今次又试吓先！个煲好大，除咗鸡脚，仲有猪皮。鸡脚有成十几只。炆得都好淋，但又唔淋到一pat pat。鸡脚似新鲜鸡脚，细细只，但几肥美。猪皮正，吸晒顶汤味，不过就较肥。但顶汤几杰身，味浓不会过咸。姜葱桶蚝之前试过砵酒生蚝，味道麻麻，所以今次试姜葱整法。点知佢话无生蚝，得桶蚝，都无所谓，只系价钱贵几廿蚊。桶蚝较大只，差不多系一只桶蚝=2只生蚝。一煲有4只桶蚝，只只都好大好肥美。除咗4只桶蚝外，全煲都系姜葱。桶蚝用粉浆包上，再去炸。粉浆略厚，而且无味。桶蚝新鲜蚝味重，肥美，无沙无碎壳，啖啖肉。但除咗蚝本身的味道外，酱汁味道不浓，而且也未能完全渗入蚝中。万发石头饭差唔多次次都会食。水准依然啦！饭粒干身，料足。又能保温。石头雪菜兰片呢个都系用石头窝送上。芥兰片切得厚度适中，入口爽脆。面头撒上已炸至干身的雪菜。底部亦有肉碎同辣椒碎，带点辣味，几惹味。送饭不错的选择。