金鶴拉麵 (利民大廈)

营业中

休息中

平日中环返工经过都冇食过今晚收工出旺角，见到终于坐低左。坐低之后，除咗陆续见到有啲食客入嚟之外，都见到有人等紧外卖。呢间店主打极浓白鸡汤拉面。个拉面除咗有鸡肉之外，仲有叉烧、做配料。但有点意外嘅系个炸牛蒡。好香脆、唔油腻！鸡肉唔会痴牙、都几嫩，然后重点系个汤。个汤一啲都唔咸，杰身嘅程度啱啱好所以一啖接一啖，将骨胶原饮落肚！！女仕必选！另外仲嗌左个极浓龙虾汤拉面。因为系限定拉面，所以拣左嚟试。佢个汤同鸡白汤一样好浓稠。调味适中，啲汤又系可以一啖接一啖饮。配料除咗有叉烧、蛋、紫菜之外，都仲可以加钱，会有龙虾尾。食拉面点可以唔讲下个面。虽然冇得拣软硬度，但系个软硬度非常之适中。我谂呢个亦都系点解冇得拣嘅原因，呢个软硬度系最适合嘅。个面亦都唔会好面粉味，唔会抢咗个汤嘅味道。再嚟就系串烧。分别嗌咗牛舌同埋五花腩。真系好值得推介。牛舌相对贵少少，但佢肉质真系非常之好，好腍。咬落去有牛油香味。黑椒同盐味，好香。五花腩调味同牛舌一样。肥瘦适中，全晚最可惜嘅系冇加个啤酒。整体来讲，性价比都几高。下次收工经过，要入嚟食个串烧，饮个啤酒。