王牌冰室 (南豐紗廠) (已結業)

成日睇到人去南丰纱厂影靓相，终于今个周末都同朋友去左。影相之后当然要医肚，我地就去左呢间好多人排队又新开张既冰室，店内装修都好有港式味道。我要左个常餐，首先会有牛乳炒蛋同多士，面食方面拣左佢地既王牌特浓沙嗲牛肉面。特浓真系冇讲错，沙嗲酱份量又多又浓，多到好似食沙嗲酱捞面咁！但又唔会太咸太稠，配合得相当好，劲好味！而牛肉亦值得一赞，份量多，大大片，无筋又唔硬，相当出色。朋友就要左个蒜香生炸鸡翼捞公仔面，呢个捞面就用左豉油汁加葱，个人认为可以重味翻少少。而鸡翼就炸得好靓，够香脆又唔会好油腻，入面仲够哂juicy。我地仲要左个西多士share。西多士可以选择芝士/花生酱做饀，我地就拣左后者。花生酱份量岩岩好，西多亦炸到金黄。加埋满满既糖浆，邪恶首选。饮品我地就选择左去隔离既王牌冰茶饮奶盖。我要左个黄金芝士奶盖东方美人，估唔到咸蛋黄加咗入芝士奶盖之后会个种咸香更增加，而且东方美人茶浓度啱啱好，两者好配合。而朋友就要左杯焦糖奶盖观音王，奶盖加咗焦糖之后有份焦香同埋脆脆地，观音王入口亦好醇香。仲可以拎埋两杯奶盖饮品入餐厅舒舒服服咁坐低饮，呢个设计真系非常好！