川辣堂 (已結業)

之前一直都想试，见最近好鬼热，一于食辣嘢，出身汗，热上加热。六点几入去，得一两台客，位置任拣，位置舒阔落，冷气足够，环境唔错。坐低就用qr code叫咗个三𩠌干锅（莴笋、牛肉、肥肠），大辣。唔洗一阵就上菜，干锅好足料，好多辣椒，仲送咗莲藕，莴笋无渣；牛肉片有牛味；肥肠最正，有少少肥膏，甘香、有咬口；加埋莲藕嘅爽，每种食材配搭都恰到好处，又辣又麻，真系一边食一边抹汗，爽爆、过瘾。白饭转咗凉皮，经理建议捞埋落干锅食，凉皮加上干锅嘅汁酱，凉皮索晒辣汁，辣上加辣。之后再加配咗风沙猪扒，新鲜炸起，热辣辣，一咬落去仲好juicy，一块五、六旧，18蚊算好抵，炸蒜亦畀好多，惹味爆脆。最后到饮品，叫咗冻酸梅汤，无冰，所以饮品份量变相多咗，不过就唔够冻。酸梅汤十分好味，够酸够味，解辣一流。值得一提，呢度员工服务好好，一坐低就会畀杯水，教点落单，而且会讲解食法，好周到。呢到平日无咩人食，价钱唔贵，我觉得值得拥有更多客人。