Y Pasta (已搬遷) 新店位置

铜锣湾嘅L Place好多嘢食，而且好多都坐得好舒服，又唔会太多人，今日就去咗Y Pasta 食 lunch。佢哋嘅午市套餐非常之抵食， $100左右有汤、高质嘅意粉、同埋一杯嘢饮。所以我同朋友就一人叫咗一个set。朋友最近个鼻有啲唔舒服，所以叫咗法式芝士浮台洋葱汤，法式洋葱汤上面通常都会有一块包，浸落去碗汤上面吸收晒碗汤嘅味道同精华。如果肚饿嘅可以叫呢个汤，就有啲嘢食住先。点样知道碗汤足料呢？就系因为朋友食完之后话个鼻即刻通返晒，都唔知系咪心理作用。我就叫咗个忌廉黑松露野菌汤，本身忌廉汤已经好好饮，黑松露油仲非常之香，未饮已经好满足。我叫咗卡邦尼蛋汁意粉，有别于一般嘅卡邦尼意粉，呢度加咗蛋汁，比平日食到嘅味道更加浓郁，烟肉亦都做到啱啱好香脆。朋友叫咗柚子胡椒鸡肉扁意粉，小小辣辣地之余又有好香嘅柚子味，味道非常清新。饮品方面我哋叫咗蜂蜜柠檬，清清哋甜甜哋，配合返头先较为腻嘅卡邦尼意粉。朋友就叫咗杯Cappuccino，卖相睇落去都好吸引，睇得出系有诚意嘅咖啡。