泉章居 (已結業)

为咗庆祝表弟毕业，今日一班亲戚嚟到泉章居食晚饭。以酒楼小菜嚟讲，呢间都算系相当唔错，每一碟菜嘅质素都好平均。盐焗鸡果然系招牌菜，咸香味浓，鸡身嫩滑，只鸡本身好大份，十几人食都够。梅菜扣肉都好吸引，酱油带甜，猪腩肉入晒味，虽然好肥腻，但无猪油嘅骚味。而我最钟意嘅系炸酿豆腐，新鲜炸起，旧旧都热辣辣，而且皮好脆，但入面无因为咁而炸到干晒，豆香味都好浓，上面嘅酿物有少少咸鱼香（真实系咪咸鱼有待确认），同平时嘅鱼肉味道多层次好多，同本身无调味嘅豆腐一齐食就啱啱好。成餐饭都喺水平之上，不过对正风口位，啲食物好快吹冻晒，要喇喇林衬热食先得。