霸嗎拉麵 (德己立街)

营业中

休息中

独食就最啱拣啲长龙餐厅。中环呢间霸吗午市生意做唔停，店员每秒都好似玩紧俄罗斯方块，而我当然系吊命嘅小方格啦～上次食过鸡叉烧，虽然减肥当尚未成功，但今次都系想试吓充满油香嘅炙烧豚肉。见到menu有新出嘅期间限定辛辣柠檬拉面 ，连日式拉面都可以酸辣㖞又点可以唔试吓呢？鲜黄色嘅厚柠檬片令满布辣油嘅拉面清新起嚟， 一大撮虾米为拉面染上夏日气色。卖相满意，但会唔会只系gimmick?食落甚为惊喜～拉面挂满辣汤汁。第一口汤我有挤压啲柠檬，但汤底已经充满柠檬皮嘅清香，酸味天然，睇嚟汤底真系特别熬制。嗜酸嘅我将大汤碗当成柠檬茶杯，用筷子笃柠檬，辣汤嘅话酸啲风味更佳，但如果叫唔辣就最好轻手啲，享受柠檬皮嘅清香喇。本来以为柠檬系主角，原来虾米先系神来之笔。点菜时无视咗佢，但一食不单脆卜卜，虾味浓若虾籽。有咗佢，我下次食一定唔叫辣，要食真啲配料味。至于豚肉脂肪比想像中薄，但肥瘦比例恰好，咬落啖啖油香，但又咬到肉地。羽根饺子冇令我失望，香脆可口。上面嘅辣酱层次丰富，辣椒爆炒过几有咸香，仲有少少脆。而呢枝水蜜桃味清酒红粉绯绯，少女味十足。酒味偏淡但桃味十足又唔会过甜，lunch break饮都不为过呀。