COBALT

营业中

休息中

呢晚响大角嘴附近揾食，见呢间餐厅走欧陆风，装修亦好有情调，两口子入去叹个晚餐先。餐牌以a la carte为主，种类都唔少。两个人拣咗一份烤鸡、一个意大利饭同一份甜品share。 祖传五香烤鸡（＄268）烤鸡整得十分香脆，入口非常惹味香口，鸡肉肉质嫩滑。分量亦相当多，仲有香滑嘅薯蓉同蔬菜，两个人share食都绝对无问题。海胆忌廉汁蟹肉意大利饭（$138）- 海胆忌廉汁好好味，入口creamy。配上蟹肉嘅鲜甜，意大利饭嘅烟韧，令味道更加提升，食到停唔到口。 特浓比利时朱古力心太软（＄88）朱古力好浓郁，一切开入面嘅朱古力酱就慢慢流出，连埋士多啤梨雪糕一齐食，味道好丰富。特别要赞下，士多啤梨雪糕带少少酸，仲有果肉，同朱古力酱好夹，真心好味。顺带一提，餐厅提供三款口味嘅雪糕选择，包括云呢拿、咖啡同埋士多啤梨味。餐厅放置巨型酒柜，入面摆放不同种类嘅酒，以吧枱设计，环境舒服好坐，啱晒一面用餐一面饮返杯。最后要赞一赞，店员亲切有礼，上菜速度好快。