Couple's Kitchen (已結業)

早前见到网上介绍呢间餐厅，墨绿色嘅装潢非常具欧陆风格，圆拱形门窗感觉典雅，今日经过终于有机会试下了。Set lunch有好多款式，包餐包、餐汤/沙律、主菜及饮品，亦可以半价转特饮。是日餐汤系椰菜花忌廉汤，入口好creamy，椰菜花味香浓，配埋微甜嘅餐包，感觉好夹。黑松露杂菌薄饼 :传统薄批上面铺满杂菌及芝士，上台时散发出阵阵香味，薄批入口松脆，黑松露味好香，杂菌配埋浓浓嘅芝士，感觉浓而不腻。All Day Breakfast :All day breakfast可以话系好多人嘅喜爱，呢度嘅all day breakfast非常丰富，除咗有正常嘅炒蛋、烟肉、香肠、烟三文鱼、炒杂菌、蕃茄及茄汁豆外，竟然仲有炸鱼柳、薯条及金华火腿，将fish and chips融入all day breakfast，好有特色。炸鱼柳炸得非常香脆，粉浆唔太厚，鱼柳依然保持鲜嫩，配埋蜜糖芥末酱食更加开胃；另一令人惊喜嘅系金华火腿，咸香味十足，估唔到配all day breakfast都无乜违和感最后饮埋有个靓靓拉花嘅Cappuccino，感觉份外满足。