i kitchen (已結業)

又系一月一度嘅聚会，今次系由朋友负责揾餐厅，可能佢系喺观塘上班，所以揾到工业大厦嘅楼上舖餐厅做聚会地点。工业大厦位置都几易揾，「巧明街」即系APM后面𠮶条街，跟住Google map去行，向牛头角方向前行就揾到「冠力工业大厦」。夜晚入工业大厦，保安亚伯要我地登记身份证先俾搭。上到2楼出转左就系餐厅「i kitchen」餐厅话大唔大，话细唔细，黑色嘅墙挂咗好多幅画，画嘅嘢我唔识，但睇落唔似系街外买嘅画，似系自己画多d。我地被安排坐近落地玻璃，即系一边梳化位一边普通座椅𠮶种。头盘我嗌咗「焗金文拔芝士配蕃茄罗勒饼」＄78。伴碟嘅沙律菜淋咗黑醋同埋有芝士碎，金文拔芝士嘅味系浓但唔怪，用罗勒饼点嚟食系幼滑天花板嘅级数。主菜我嗌咗「照烧美国谷饲牛肩胛」＄178。 嗌3成熟似5成熟上枱，牛味浓系我至爱，肉质结实而且肥瘦适中，我乜汁都唔洗点，好快食哂2件牛肩胛。