十二味不只是烤魚 (已結業)

今日去黄埔行街，行行吓已经到黄昏，我最钟意食辣野，所以行过见到呢间有辣野食，于是入去试吓。门口招牌系用光管切成，好吸睛，入面嘅装修以方枱为主，有梳化卡位，都坐得舒服。呢间餐厅有烤鱼同香锅食，虽然好难抉择，但见隔离枱食紧烤鱼好吸引，所以就选择咗烤鱼。佢地有4款鱼选择，我地点咗比较少听嘅清江鱼，而味道就选择咗招牌香辣味（小辣），条鱼一上枱就香味扑鼻，条鱼都好大条，有成个盘咁长，上面铺满辣椒同芫荽，首先试一试条鱼，好滑一d都唔鞋，鱼肉吸收晒d汤汁，好惹味，个汤汁唔系太辣，咁就冇覆咗鱼嘅鲜味，食完一啖会仲想继续食落去。而配料我地就点咗寛粉，放入汤汁入面煮一阵，好快就变咗透明，食落好烟韧，完全吸收晒汤嘅精华。仲有点咗鹅肠，煮一煮好易熟，好爽口，佢地好贴心清走晒d肥膏，所以食多几条都唔怕肥。食边炉梗系唔少得解渴饮品啦，叫咗杯热情果梳打，劲大杯，酸酸甜甜好好饮，杯饮品好足料，有好多热情果粒粒喺入面，加埋有汽嘅梳打，真解渴。