河內大娘越南餐廳 (已結業)

尖东么地道巴士对面有间越南菜小店，原来有唔少人都同我地一样，都咁识食，识得揾到嚟呢度。门口摆放左餐牌好清晰，价钱都几贴地，餐厅挂起左好多手绘越南草帽，别有一番越南风味。大热天时，即刻叫左两杯冰凉饮品解渴。莲子龙眼冰清甜润喉又养生，莲子甜兹兹，龙眼肉饱满。珍多冰椰奶香浓，绿色粉条口感有点像啫喱，配埋绿豆蓉令整杯饮品口感更丰富，挺喜欢的！香茅煮大蚬用大铁碗盛载，蚬的品种是沙白，比一般蚬仔大只啲同厚肉啲，富海水鲜味，用香茅煮嘅汤底清新又鲜甜，成碗汤都饮得，好味到我地饮哂成碗！小食拼盆有4款小食，分别系蒸粉包、炸春卷、炸鸡翼同埋炸虾饼。蒸粉包有木耳丝同其他蔬菜丝，味道较清新，炸春卷外面炸得十分脆口，同越南食过的非常相似，炸鸡翼好香口，炸虾饼弹牙，点少许甜酸酱食更惹味。鲜茄蟹肉汤檬的蕃茄汤底超级浓郁，惹味开胃，有蟹肉、鲜虾等海鲜令碗檬粉更鲜甜，另外有扎肉、肉丸等配料，整碗汤檬感觉好足料，食完有好满足嘅感觉。这小店的越南菜相当地道，味道亦非常正宗，味觉彷如置身越南河内之中。