食道樂 (嘉華大廈) (已結業)

今日去咗荃湾交收完，就顺便食埋晏就先走。同朋友拣咗好耐，最终就拣咗呢间韩国餐厅食，呢间餐厅嘅外观好得意，成间课室咁，仲要有好多习作嘅样系度，好有代入感。猪肉饭个饭好够汁，而且唔会太辣，食落去唔会觉得太浓味。只蛋因为系太阳蛋嘅关系，个蛋黄仲可以吸食，唔会煎到太老。当然唔少得个主菜，个猪肉都好入味，食落去既唔会好韧口，又唔会淋到好似肉饼咁，整体嚟讲我觉得都系有为香港人口味调整。牛骨汤+饭个汤第一啖饮落去已经好够味，啲牛骨因为系用嚟煲汤嘅关系，肉质都好淋，连啲根都好易就咬得开，而个汤仲有粉丝同金菇菜，吸晒啲汤嘅味，简直系夹晒同白饭一齐食，食到停唔到手。