Amour Cafe (已搬遷) 新店位置

睇咗食评先o黎，环境心中有数，细…真系细咗o的，櫈…都真系坐得唔系几舒服，不过，意粉又真系几好味！同太太两个都系叫餐：布朗尼斯肉酱意粉、香草忌廉鸡扒意粉，叫做一红一白…餐汤系意大利菜汤，用杯上，味道淡，有o的油…麻麻地。主菜上场，布朗尼斯肉酱意粉，好多汁，以为会好淡，点知几够味。茄汁带o的甜味，几特别，唔知系咪人人钟意，我就觉得唔错。肉酱同意粉o既份量都好多，实食得饱。香草忌廉鸡扒意粉，同样系足本！！粉多扒大，同样系多汁，不过忌廉味仲浓o的。个人觉得鸡扒唔系好夹个意粉，配火腿或者鸡丝可能好o的，o的味冇咁抢。甜品一个加钱(+$6)转咗黑森林芝士饼，另一个要咗吉士蛋。第一次食黑森林芝士饼，芝士好有弹力，虽然唔系好有芝士味，但甜味适中。正斗之选！吉士蛋唔滑、唔够冻(事先同我o地讲咗)，个人喜好，唔敢推介！餐饮要咗意大利咖啡，味道偏淡，而且劲多奶。以价钱o黎讲，算平！以食物质素o黎讲，算好！以服务o黎讲，算有礼貌！唯一要弹，出菜混乱同慢。p.s. 见个个食友都叫佢o地执下个 look，不过，细心谂下，疑似家庭式经营，人手、规模有限，如果装修大搅，价钱会唔会仲咁经济？帮衬@9-11-08