佳記餐廳 (已結業)

星期日行完山路过良景邨, 因为体力消耗咗唔少加上肚饿, 所以拣咗间比较就脚嘅佳记餐厅。下昼三点嘅佳记一样好多人, 不过餐厅入面有好多二人座嘅卡位, 所以都唔洗等位, 一行入去就有位, 但座位有啲迫。一坐底就叫咗个下午茶set, set入面有一碟ABC酱猪软骨炒饭再加一杯冬OT, 承惠48蚊。ABC酱其实系印尼产嘅酱油, 之前听过有人去印尼旅行都会突登买返一支返屋企, 但我自己就第一次食。炒饭一上嘅时候已经闻到好重嘅酱油香, 但卖相就麻麻。不过每一粒饭都沾有酱油, 而且配料例如猪软骨、蛋、辣椒同埋葱粒都唔算少, 都算过关。食落去饭粒唔会偏软, 个质感以炒饭黎讲啱啱好, 但由于落咗酱油嘅关系, 个饭都系偏咸。猪软骨切得比较大粒, 大细同keyboard啲制差唔多, 如果切细啲会更加好。如果唔食辣嘅话, 记得落单讲定走辣椒。整体可以接受。冻柠茶都ok, 算系比较大杯, 质素就系普通茶餐厅嘅水平。上openrice先知原来呢间系连锁店, 佢除咗餐厅楼面, 其实佢都有卖面包。有唔少包例如菠萝包睇落都唔错, 如果下次有经过佢嘅分店, 都会买黎试下。