大尾篤燒烤王 (已結業)

我经常觉得如果要搅食肆嘅话，最好赚就应该做烧烤场。用烧烤场，唔驶请厨师，剩系腌好啲食物就搅掂。由是故，从来唔会提议去烧嘢食。不过，烧嘢食都有一个独有嘅优胜之处，就系烧得好食与否，完全系「个人问责」，与人无由。除非有人帮你烧啦，好似我同阿K咁。今次一大班老友记山长水远嚟到呢度烧嘢食，一嚟聚聚旧，二嚟系同我地嘅老友记W「律B」饯行，因为佢会去上海公干至少三个月。在此希望佢可以顺顺利利，最好揾到个如意郎君(按：W「律B」并唔系只得内在美，外在美一啲都唔输蚀，阿K都赞不绝口)，了却我地成班人嘅心愿。言归正传，讲番烧嘢食。个人认为，除咗食物要腌得好之外，炉火都好紧要。虽然烧嘢食之前一晚落过吓雨，但系啲炭仲可以保持干身，所以起嘅火十分靓，烧起上嚟，想唔好食都几难。查实食物腌得都唔系话好出色，烧完嘅味道都中等。味道都系其次，最重要系一大班人可以一齐烧嘢食，一齐谈天说地，正如某广告话斋，此刻无价。换取一刻无价，我地要付出嘅金钱唔多，只系每人七十蚊。