小神燈新派飯館 (已結業)

母亲节饭去呢间食，晚市有两个时段：6pm同8pm，我哋拣咗8pm，去到基本上都坐满晒，几好生意。呢间餐厅出名装修好有心思，以旧式香港做主题，墙身有好多经典嘅香港电影，摆设都系用旧式香港嘅用具，包括有以前阿嫲年代用嘅圆桶形热水壶，一路食饭一路打卡都好适合。避风塘炒肉蟹话明肉蟹，啲肉真系好多好实净，而且炒得好入味，连平时唔食蟹嘅小朋友都话好味。白灼海虾只只虾都好大只，啲肉又爽又弹牙，点埋甜豉油真系非常好味。小神灯小炒皇+海鲜粉丝杂菜煲呢两款就比较普通，冇咩特别好评论。菠萝咕噜肉咕噜肉炸得外脆内软，啲酱甜酸度校得啱啱好，非常开胃。宫廷浓汤猪肚鸡鸡汤底极之浓郁，浓到有少少偏咸，但系我好钟意饮，加埋啲猪肚、鸡肉、鱼腐都好好味。鱼香茄子煲味道唔错，不过份量有啲少。小神灯一品炒饭超大碟，而且啲料好足，好多虾仁。