孔夫子 (Club East洞天) (已結業)

有次经过见到呢间野，walk in 食唔到，上星期就专登卜台去食。首先要赞下佢啲位好阔落，唔会好似变相搭台果啲餐厅咁迫，坐得好舒服。冷盘叫咗酥皮茄子，睇落好工整，似一旧大蘑菇多过茄子，当然食落真系茄子黎嘅。炸皮做得薄脆，冇油益味，茄子亦冇乜索油。味道黎讲唔系特别出色，但系几啱冷盘攞黎开胃而唔应该食滞嘅原意。主菜叫咗个柠檬汁炸虾球，放一块柠檬喺底一条芦笋喺面，几好睇，不过唔理解佢扮紧乜。食落味道相当出色，柠檬汁虽然做得偏甜，酸味唔够，但配大件炸虾球仍然相当好味，我连续食咗3旧，系完全冇腻感。食到第4旧开始有少少嘅，咬块柠檬就消到滞。主食系铜盘沙姜鸡饭，饭焗出黎嘅火候几好，系老友记讲果种「虾仔米」黎，通常呢种做法嘅饭，大家梗系会争住食𩠌下面塾底果啲饭嘅，比我争到（小小啦），但系只有沙姜味而冇鸡味。当然因为沙姜味本身太抢，饭冇鸡味系非战之罪黎嘅。鸡本身都嫩滑，有少少鸡味啦，去骨上我自己就唔太好，不过都系好味嘅。埋单4旧水咁上下，整体黎讲我会拣呢间好过去同价位嘅酒楼。