新泰東南亞餐廳

营业中

休息中

餐厅门面摆住一对大象摆设，充满泰国风情，沿住楼梯落去正式进入餐厅，卡座全是梳化，甚有气派。长长嘅menu 令人花多眼乱，款式多而且价格公道，几经挣扎我哋终于点好菜。最吸睛嘅莫过于面包焗咖喱软壳蟹。几只脆卜卜嘅软壳蟹脚浸喺咖喱入面，卖相极佳。咖喱混入蟹肉同蛋白，更加鲜甜。面包点咖喱汁食又好玩又好食，不过因为装住咖喱，面包好快就变软，要快手食呀！！我哋特意点咗客印度薄饼，唔浪费每一滴咖喱汁。呢度嘅印度薄饼系酥饼而唔系naan，比较有油香，即使吸咗汁都仲好脆。参荅炒通菜好香虾米味，咸香得嚟唔会太重味，不过可能人客多，温度略嫌冻咗啲，但味道真系冇得弹。我哋亦叫咗唔少甜品试，小拼盘份量已经够2-4人share。不过糕点类好似凝固唔够，但味道就OK嘅。比较特别嘅系南瓜布丁，布丁蛋、奶味较重，偏甜，连埋软糯南瓜一齐食软笠笠咁，味道几夹，不过布丁就唔太够滑。呢个价位有咁好嘅service同环境，无论系人少少定成group人食饭都好适合。