茶墨 (已結業)

有日因为工作嘅关系，搞掂手头上嘅嘢都已经接近三点，未食晏但系夜晚约咗人又唔想食到太饱，同事就提议不如食个蛋糕饮杯嘢当一餐，于是就去咗The ONE嘅茶墨。茶墨嘢饮嘅选择都唔少，除咗佢嘅招牌水墨风系列，仲有雪糕奶昔、奶茶、焦糖芝士、冰摇茶、茗茶、纯茶同埋养生茶，我呢就几怕饮甜嘢，而且一场嚟到冇理由嗌杯奶茶就算，所以就要咗杯睇落最唔甜嘅水墨风芝麻乌龙茶。问咗店员有边只蛋糕冇咁甜，佢介绍一系试吓个伯爵茶蜂蜜蛋糕或者个柚子芝土蛋糕，咁我就试咗个芝士蛋糕。水墨风系列系茶墨嘅招牌饮品，佢用芝麻酱当墨水画喺只杯入面，几有创意。上面都有提过我唔饮甜嘢所以我叫咗无糖，芝麻嘅少少苦味加埋乌龙茶本身嘅味啱啱好。芝士蛋糕平时都会好甜，不过沟埋啲柚子味中和返，柚子嘅清新味同蛋糕嘅甜味亦都啱啱好。整体而言，我觉得佢个茶几好饮，打卡一流，下次可以再饮。