譽小館 (已易手) 新餐厅

其实上水酒楼一般都系水准比较差，所以我冇抱太大期望咁入去食，点知叫咗几样，佢每样都系我心目中嘅水准之上，好有惊喜呀！小笼包外貌普通，唔算好多汁，但总算啖啖肉都湿，唔会干争争。黑松露带子饺，入面系啖啖嘅虾肉，就好似虾饺上面加咗带子同黑松露咁。姜葱牛肉云吞捞面，冇加其他酱油，有啲淡，但冇味精好健康。药膳鸡脚，味道有啲似老火汤，药材味唔系太重，但煮得唔会太淋，又唔会太硬，口感好好。点心纸上有鱼皮，喺香港好少地方有得食，谂住买来试吓，点知佢话冇，有啲失望。以往喺上水饮茶，都冇乜边间好食，依家终于有一间唔错嘅点心舖，以后会多啲帮衬。