好時沙嗲

营业中

休息中

位于尖东嘅好时沙嗲，由十几年前学生时代已经帮衬，咁多年嚟分别同过屋企人、同学、同事嚟过，对我讲系一间回忆满满嘅餐厅。前排去红馆睇演唱会，就顺便嚟食晚餐。两个人点咗海南鸡饭、炒贵刁、巴东牛肉同薄饼。落单后几分钟海南鸡饭就上枱，好有效率。海南鸡肉质嫩滑，而且完全无骨，啱晒我哋呢啲唔钟意𦧲骨嘅人。虽然系三黄鸡但唔觉得太肥腻，只系稍嫌鸡皮唔够爽弹。正宗海南鸡以用鸡汤同姜葱蒜浸熟，所以本身系无乜咸味只有鲜味，主要靠蘸三种酱料嚟调味。油饭味道够浓，油香突出而且油润感十足，饭嘅软硬度亦适中。炒贵刁好有镬气又惹味，食落比较辣。贵刁每条上色均匀，卖相好靓，比起一般河粉更烟韧有咬口虽然偏油腻，但炒粉面唔够油就唔好味嘅。配料有虾仁、腊肠同芽菜，腊肠甜甜地几好味。巴东牛肉香料味同椰奶味浓郁，食落少辣。牛肉份量好多，有啲比较大旧，有部份已经散咗变咗牛肉丝融入酱汁之中，配埋薄饼食就啱晒隔咗几年无食，水准依旧，仍然系咁好味而且价钱好平，真系好抵食。