薈亞廚房 (已結業)

星期六去咗荟亚厨房食晚饭，因为屋企话唔煮饭。荟亚之前都食过，觉得水准都好稳定，今次都要饮杯龙眼冰，我次次去都点，大大杯好好味。越式拼盘有3款小食，春卷好脆点酸甜汁食唔错，牛油鸡翼几香牛油味，不过都几油下，食完应该好肥。扎肉我就无食到啦。炭烧猪颈肉大大份，烧得香气四溢，有少少㶶边，肉质爽口，唔点酱汁都已经好食。泰式肉碎生菜包算系几辣，炒得够香，除咗包生菜食之外，亦都系送饭嘅好配菜。亚来咖喱牛腩送饭又系一流，咖喱汁浓郁，香料味唔会太过浓烈，同牛腩好夹。