スーパー丼 (大埔超級城) (已結業)

入到餐厅，坐低无几耐都觉得有少少伏，见无乜人又有位直入，坐咗喺角落位。睇紧餐牌期间，隔离枱起身走，除咗投诉职员服务欠奉，原来仲漏咗单，听到话餐厅话再落可以俾八折佢哋。如是者，我睇完份餐牌，想叫嘢食，等咗两分钟都未见有侍应过嚟。于是我走去出餐个度同个职员讲，我想落单。跟住有个貌似经理嘅人同我讲，返去坐低，等佢同事落单。我心谂，新年流流，我唔同你讲你同事好似啱啱先落漏成枱单。于是俾多次机会哩间餐厅。返埋位，坐低无耐真系有人过嚟落单，叫咗两个餐，另外同职员讲想要三杯清水。之后忽然间多咗人入嚟食嘢，坐满人咁滞。时间慢慢咁过，我哋除咗三杯滚水，就无喇。后过我哋入坐啲客人陆续有嘢食上枱。初头我见到啲一锅锅嘅寿喜烧，心谂，fine 主打嚟嘅，应该系大量预先制作。但又过咗二十分钟左右，我隔离枱两个丼饭同刺身都上埋枱，我就知我太仁慈喇。即刻问个职员系咪漏咗单，佢话帮我跟跟。之后佢返返嚟，系送餐俾另一枱客人，无理会过我。我就执嘢走。出门前遇到同我落单𠮶个侍应，佢问我落咗啲咩，佢可以帮我跟跟，𠮶下我火都嚟埋，碍于新年流流，无同佢理论，只系笑笑口咁同佢讲，你连我落咗咩都唔记得。跟住走人。