M3 Italian (已結業)

河畔花园有唔少餐厅，食意大利西餐嘅就好似只有呢一间m3。之前试过大围𠮶间分店，觉得几好食，今次就食河畔呢一间。喺平日嘅晚上嚟到，好好彩有位。餐厅嘅环境宁静，有少少暗淡嘅灯光，增加咗浪漫嘅气氛，都几啱情侣拍拖食饭倾计。我同朋友点咗二人套餐，五百蚊再加一。套餐包两碗餐汤、一个前菜小食、两个主菜同埋两个甜品。1) 凯撒沙律 (⭐⭐⭐⭐⭐):卖相十分唔错，啲面包粒大大旧，好有口咁。我哋拣咗配三文鱼，三文鱼嘅鲜味同沙律嘅酱汁融为一体。2) 烤美国安格斯肉眼扒 (⭐⭐⭐⭐⭐):肉眼扒五成熟，好大块肉质鲜嫩，又唔会有好多肥腻嘅部分，几好食。个人认为咁多款主菜，入面拣呢个比较抵食。3) 野菌意大利饭 (⭐⭐⭐⭐⭐):意大利饭配有野菇，用烤嘅形式煮成，非常入味。另外有黑松露嘅成分，增添咗意大利饭香味。最后甜品拣咗雪糕球，当晚系云呢拿味道雪糕球，有两嚿，可以同朋友share。整体嚟讲，餐厅嘅味道唔错。一个二人套餐，就可以组成一个丰富嘅晚餐。