梨花園 (已結業)

依餐都可以话系亲戚请嘅，事缘亲友送赠咗两张$50City Super嘅现金券，一向都好少去𠮶度买嘢，嫌佢贵啰，反正平时要买开嘅嘢去一般超市都有，所以，揾晚唔得闲煮饭，就用咗嚟去佢个美食广场免费食番餐。海港城City Super个美食广场，都有成十多间食店，中西日印韩泰越……都有，不过以日本嘢占多数，但系我哋都无拣，小弟拣咗间卖越南嘢嘅「越膳」，食评另文再见，而老婆就拣咗卖韩国嘢嘅「梨花园」。多款套餐样板晌晒铺前玻璃柜，慢慢睇过晒先拣，卒之拣咗个石头鸡肉饭套餐$50，一份鸡肉石头锅饭，配一份沙律或泡菜，跟例汤或饮品。石头鸡肉饭鸡肉超多，睇相就知，堆满成个石头锅面，味道不过不失，而且饭亦好多，真系好似赶收工大赠送，但点知油更多，饭内很多油，食完一底都系油，都唔敢刮底食饭焦，嘥料。无要沙律，更系拣泡菜，老婆至爱，泡菜嘅味道都只可以话系OK，够辛辣，但未够爽脆，仲系得好细兜；而要咗例汤，昆布汤，亦都系OK嘅水平，唔浓亦唔淡，叫做有碗汤到肚。虽然系City Super，美食广场即系美食广场，食物水准都系一般啲，若非唔使钱，应该都唔会嚟帮衬，$50可以食到好少少嘅嘢啰！